Doctor Ahmad Nadeem Rafee Ghazal


               غزل


         احمد ندیم رفیع


اے   دلِ  نادان  ،  چلا ہے کہاں 
عشق  تو ہے کار گہِ  ہفت خواں 

    خود  لبِ  فریاد   ہے  زخمِ کہن
    ٹھیک  نہیں   نیّتِ   چارہ  گراں

ہو   گۓ   ہم   کشتۂ   منقارِ  تیز
سنتے  ہوۓ  نغمۂ  شیریں زباں

    حُسن  چلا  ایسی قیامت کی چال
    عشق  ہوا   زیر و زبر،  نا تواں

روز  اُدھر   ایک    تقاضا   نیا 
اور  اِدھر   ایک   وہی نقدِ جاں

    طرّۂ   پُر پیچ    ہو   یا   زندگی
    سلسلہ   در  سلسلہ   اک امتحاں

دُور افق  پار  ہے سورج کی لَو
یا  ہے کوئی   جلتا   ہوا  آشیاں

    گاہ   وہی   درد   بھری خامشی
    گاہ   وہی   شورشِ  آہ  و  فغاں

آہ  نکلتی  ہے  نفس  در  نفس 
کیسے کروں شرحِ غمِ رفتگاں

    سنتے  رہے ہم جرسِ دل فریب
   اڑتی  رہی   گردِ   رہِ   کارواں

 گُھل   گۓ جب رنگِ نشاط والم
  بن  گئی  تصویرِ  دلِ   رائیگاں

         ایک پری  چہرہ  مرے  روبرو
    اورمیں خوش فہم گماں درگماں

زیرِ زنخداں  ترا نازک سا ہاتھ  
سوچ میں  ڈوبا  ہوا سارا جہاں

               

                 ق
              ( حمدیہ )


سہمی  ہوئی  چشمِ  تحیر مری
سامنے اک  جلوہ  گہِ  بیکراں

ایک  طرف میری  جبینِ  نیاز 
ایک  طرف سنگِ  درِ  آستاں

ایک طرف  ساحلِ کوۓ مراد 
ایک طرف  لغزشِ موجِ رواں

ایک  ہی  محور قدم اندر قدم 
ایک ہی تسبیح زباں در زباں

میری طرف  بھی نظرِ التفات
 خام  سہی  میری  نواۓ فغاں

لوحِ  دلِ زار پہ لکّھا ہے سب 
گرچہ نہیں جُراَتِ عرض وبیاں

مٹ گۓ جب فاصلے تو یہ کُھلا
کچھ بھی نہ تھا تیرے مرے درمیاں

       ڈاکٹر احمد  رفیع 

Comments

Popular posts from this blog

Tum Kon Piya Dialogues & Drama Pics

Tum Kon Piya Episode Dialogues & Drama Pics